ARGJENTINË: FORTLUMTURIA E TIJ KRYEPESHKOPI I KISHËS ORTODOKSE TË SHQIPTARËVE TË ARGJENTINËS DHE TË AMERIKËS LATINE ALEJANDRO GREKO (GRECO) VDIQ | ISHTE GJAK SHQIPTAR NGA ARBËRIA.

Buenos Aries, Argjentinë | Ceremonia e ngushëllimit do të mbahet të hënën më 21 prill në shtëpinë e zgjimit Vicente Shilinjo (Scilingo).

Kryepeshkopi Aleksandër i Argjentinës dhe Amerikës Latine i ka rrënjët tek pasardhësit e Gjergj Kastriot Skënderbeut.

Njëri nga prindërit mbante mbiemrin Muzakaj, ndërsa tjetri mbante atë Greko.

Shumë shekuj më parë, familja e tij pat lënë Arbërinë e shkrumbuar nga luftërat dhe qe vendosur në Kozencë.

Hirësia e tij Aleksandër, ishte Kryepeshkop i Kishës Ortodokse të Shqiptarëve të Diasporës në Amerikën Latine, e thënë ndryshe pasuese e kishës së Nolit, por në pjesën jugore të kontinentit.

Shqiptarët e Argjentinës: Kjo kishë ka komunitetet e veta në Argjentinë, Brazil, Kili, Uruguai.

“Dy janë qëllimet e punës sonë: të shërbejmë që shumë njerëz të ritakojnë besimin tek Zoti dhe t’i takojmë shqiptarët me vlerat kulturore të kombit tonë përmes simboleve dhe historisë.

Madje, synojmë që të gjitha këto t’i bëjmë në shqip”, thoshte Kryepeshkopi me seli në Buenos Aires të Argjentinës.

Ai tregon se në këtë shtet dhe në gjithë Amerikën e Jugut ka shumë shqiptarë, shumë arbëreshë që kanë ikur nga Italia Jugore dhe janë vendosur atje.

“Ne jemi me mijëra, por shumica është e asimiluar në vendin ku ka jetuar dhe e kanë harruar pothuajse lavdinë e origjinës shqiptare. Po luftoj për t’i ribashkuar, për t’iu kujtuar origjinën”, thoshte ai.

Amaneti i Kryepeshkopit: “Unë vij nga një familje me origjinë arbëreshe e jugut të Italisë.

Paçka atyre shumë shekujve që kanë kaluar nga koha që familja ime la Shqipërinë, gjithmonë e kemi ruajtur edhe të folurën.

Arbëreshët që jetojnë në Amerikën e Jugut e kanë humbur jo pak të folurën shqipe, gjuhën pra, e megjithatë po përpiqem ta rikthej vëmendjen tek ajo.

Gjithnjë e kemi pasur në ndërgjegjen tonë, tokën e origjinës. Kjo koshiencë nuk ka humbur as përgjatë shekujve.

Kjo është e rëndësishme për t’ia transmetuar edhe të rinjve tanë. Gjithnjë kam thënë se porta jonë është e hapur për të gjithë ata që kanë gjak shqiptar”.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit