AUTORITETI KOMBËTAR PËR SIGURINË KIBERNETIKE NJOFTOI SE DO TË NISË PROCESIN TEKNIKO-LIGJOR PËR BLLOKIMIN E RRJETIT SOCIAL VIRTUAL TIKTOK.

Tiranë, Shqipëri | Pasi kryeministri i Republikës së Shqipërisë Edi Rama bëri të ditur vendimin për mbylljen e platformës sociale virtuale TikTok në Shqipëri, me qëllim sigurinë dhe mirëqenien e fëmijëve dhe të rinjve në hapësirën digjitale, Autoriteti Kombëtar për Sigurinë Kibernetike (AKSK) njoftoi hapat që do të ndiqen.

“Hapat drejt implementimit përfshijnë nisjen e procesit tekniko-ligjor për bllokimin e platformës TikTok në një masë të gjerë në nivel kombëtar, me kohëzgjatje afërsisht 1 vit”, thuhet në njoftim.

Autoriteti Kombëtar për Sigurinë Kibernetike (AKSK) thekson se në bashkëpunim me Agjencinë Kombëtare të Shoqërisë së Informacionit dhe disa institucione të tjera publike, ka koordinuar dhe ofruar një kontribut në analizën paraprake teknike dhe shkencore për ndërmarrjen e këtij vendimi të rëndësishëm.

AKSK bën të ditur se do të vazhdojë të jetë një pjesë thelbësore e procesit të implementimit, duke ofruar ekspertizën e saj për të siguruar zbatimin e suksesshëm të këtij qëllimi.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit