GJYQTARJA E GJYKATËS KUSHTETUESE TË REPUBLIKËS SË SHQIPËRISË ELSA TOSKA DHA DORËHEQJE NGA FUNKSIONI I SAJ.

Tiranë, Shqipëri | Gjyqtarja e Gjykatës Kushtetuese, të Republikës së Shqipërisë, Elsa Toska, dha dorëheqje nga funksioni i saj.

Ajo e motivoi aktin e dorëheqjes me shkaqe vetjake të cilat nuk i bëri publike.

Lajmi u pohua nga zyra për shtyp e Gjykatës Kushtetuese.

Njoftim | “Në përgjigje të interesimit tuaj ju njoftoj se gjyqtare Elsa Toska ka paraqitur kërkesën për dorëheqje”, thuhet në njoftimin e zyrës së shtypit të Gjykatës Kushtetuese.

Tashmë Gjykata Kushtetuese mbeti me 8 anëtarë nga 9 që ka në organikë.

Gjyqtarja Elsa Toska u votua nga Kuvendi si anëtare e Gjykatës Kushtetuese, në muajin nëntor të vitit 2019.

Ajo u bë një nga 9 anëtarët e Gjykatës Kushtetuese pasi u votua me 105 vota pro dhe 2 kundër nga Kuvendi i Republikës së Shqipërisë.

Ajo ka studiuar në Fakultetin e Drejtësisë në vitet 1996-2000 si dhe ka doktoruar për ligjin kushtetues dhe atë administrativ.

Ajo e ka filluar karrierën si ndihmës komisionere e Avokatit të Popullit të RSh.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit