GREQIA BËN PAK PUNË PËR KRIJIMIN E KUSHTEVE PËR LËVIZJE TË LIRË TË GJALLESAVE NËPËR LUMENJ DUKE MOS MARRË MASA PËR ÇMONTIMIN E PENGESAVE ARTIFICIALE NË KUNDËRSHTIM ME PRAKTIKAT E BASHKIMIT EVROPIAN.

Athinë, Greqi | Në kundërshtim me praktikën e zakonshme në shumicën e pjesëve të Evropës, Greqia po bën pak për të çliruar lumenjtë dhe përrenjtë e saj nga strukturat e vdekura apo edhe të rrezikshme të krijuara nga njeriu që pengojnë rrjedhën e tyre natyrore.

Një projekt nga Instituti Mesdhetar për Natyrën dhe Antropos (MedINA) kërkon të korrigjojë këtë mbikëqyrje duke hedhur dritë mbi problemin.

“Rivendosja e lumenjve tanë nuk është një luks; është një domosdoshmëri. Është thelbësore që sedimenteve dhe organizmave të gjallë t'u jepet liria e lëvizjes”, tha menaxherja e projektit Eirini Liracaki (Lyratzaki).

Ajo tregon për diga të vjetra, punime vaditëse, kanalizime, ura me ujë të ulët dhe struktura të tjera që nuk i shërbejnë më asnjë qëllimi, por vazhdojnë të bllokojnë rrjedhën e lumenjve.

“Hapi i parë është të identifikohen strukturat krejtësisht të padobishme dhe ato që mund të hiqen pa shumë vështirësi”, tha ajo.

E lidhur me rregulloret e BE-së që parashikojnë restaurimin e 25000 km lumenj deri në vitin 2030, Greqia nuk ka marrë ende ndonjë angazhim specifik, megjithëse ka afat deri në shtator 2026 për të paraqitur planin e saj paraprak.

Ndërkohë, MedINA ka përfunduar studimin e saj të pellgut të lumit Sarantaporos në Greqinë veriperëndimore, duke regjistruar 240 pengesa përgjatë të gjithë rrjetit, deri në vendin ku takohet me Vjosën (Aoos), një lumë i përbashkët mes Greqisë dhe Shqipërisë dhe të cilin Medina e konsideron si xhevahir në kurorën e projektit të saj.

“Ky është i vetmi lumë me rrjedhje të lirë në Evropë, që rrjedh pandërprerë për 260 kilometra nga malet e Pindos deri në det. Ne duhet ta mbajmë atë kështu”, thotë drejtori i organizatës, Aleksis Kacaros (Alexis Katsaros), duke shtuar se Shqipëria e ka shpallur tashmë Vjosën, siç quhet lumi atje, Park Kombëtar.

Greqia gjithashtu ka shpallur dy zona përgjatë Vjosës (Aoos) se meritojnë mbrojtje të veçantë, por, ajo nuk ka nxjerrë një vendim ministror që do të përcaktonte kushtet e kësaj mbrojtjeje, duke lënë karakterin e paprishur të zonës dhe integritetin ekologjik të ekspozuar ndaj degradimit dhe ndërhyrjeve të shkaktuara nga njeriu.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit