HULUMTIMI I UNIVERSITETIT TË KEMBRIXHIT PARAQET KONCEPTIN E SAPOLINDUR TË EKONOMISË SË SYNIMEVE: PËR CHATBOT-et PARASHIKIMI I QËLLIMEVE NJERËZORE ËSHTË SFIDA E RE | NË PLAN TË DYTË TË DHËNAT VETJAKE.

Londër, Britani e Madhe | Mjetet e inteligjencës artificiale, si asistentët dhe chatbot-et, mund të bëhen të aftë të parashikojnë preferencat e njerëzve dhe kjo aftësi mund të shfrytëzohet për qëllime ekonomike ose politike.

Këtë e tregon hulumtimi i Universitetit të Kembrixhit, i cili, paraqet konceptin e sapolindur të ekonomisë së synimeve.

Studiuesit përshkruajnë një të ardhme jo shumë të largët në të cilën asistentët e IA, duke qenë në gjendje të dinë shumë për përdoruesit me të cilët komunikojnë, do të jenë në gjendje t'i shtyjnë ata të kryejnë operacione, të tilla si blerja e produkteve ose zgjedhja e një partie politike.

Për studiuesit, ne po kalojmë nga ekonomia e vëmendjes, tipike e mediave sociale virtuale dhe e fokusuar në mbajtjen e njerëzve të ngjitur pas aplikacioneve, në një ekonomi të qëllimeve, në të cilën softueri i IA mbledh informacion që kompanitë mund t'ua rishesin të tjerëve.

“Nëse të dhënat kanë qenë monedha e informatikës moderne, qëllimet njerëzore do të jenë thesari i së ardhmes”, paralajmërojnë ata.

“Nëse nuk rregullohet, do të ketë një vrull ari për ata që synojnë, drejtojnë dhe shesin qëllimet njerëzore”, thuhet në studim.

Studimi paraqet disa shembuj që mund të ndodhin me konsolidimin e chatbot-eve të inteligjencës artificiale.

“Midis tyre, një asistent virtual, i cili, duke analizuar kërkimet dhe lëvizjet në internet, sugjeron rezervimin e një pushimi në një vend të caktuar pikërisht kur keni filluar të mendoni për të”, thonë autorët.

Si dhe një sistem rekomandimi, i cili, bazuar në ndërveprimet sociale, rekomandon lajme dhe përmbajtje që konfirmojnë opinionet dhe inkurajojnë njerëzit të votojnë për një kandidat të caktuar politik.

“Duhet të fillojmë të shqyrtojmë ndikimin e mundshëm që një teknologji e tillë do të kishte në aspiratat njerëzore, duke përfshirë zgjedhjet e ndershme, shtypin e lirë dhe konkurrencën e drejtë të tregut, përpara se të bëhemi viktima të pasojave të saj të paqëllimta” janë fjalët e znj. Jonnie Penn, koordinatore e studimit nga Qendra Leverhulme për të Ardhmen e Inteligjencës në Universitetin e Kembrixhit.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit