INFLAMACIONI: 4 GJËRAT QË BËJNË MJEKËT PËR TA LUFTUAR.

Uashington, Amerikë | Një aleat i fortë në luftën kundër inflamacionit janë disa lëvizje që bëjmë çdo ditë. Dy ekspertë na japin disa mësime të dobishme anti-inflamatore. Ju mund të mendoni, si shumë njerëz, se inflamacioni ka një konotacion negativ si term mjekësor, por realiteti është ndryshe. Inflamacioni mund të përshkruhet edhe si i vlefshëm për trupin, pasi aktivizohet kur ka ndonjë kërcënim të jashtëm. Problemi fillon kur kthehet në një gjendje kronike, inflamacion kronik. Kjo gjendje, nga ana tjetër, mund të çojë në sëmundje të tjera kronike, të tilla si diabeti i tipit 2, sëmundjet e zemrës, dhe sëmundjet autoimmune. Prandaj është e rëndësishme që ai të rregullohet në mënyrë efektive. Hapi i parë dhe më i rëndësishëm është të ndiqni këshillat e ekspertëve. Jepini përparësi probiotikëve dhe prebiotikëve. Ushqimet e fermentuara si kosi dhe trushitë konsiderohen veçanërisht të rëndësishme për mikrobiomën e zorrëve. Prebiotikët dhe probiotikët, të cilët përfshihen edhe në ushqimet e mësipërme, por edhe në ato të pasura me fibra bimore, si në fruta, perime, bishtajore dhe arra, ushqejnë bakteret e mira të zorrëve, duke ulur shanset për zhvillimin e inflamacionit. Si rezultat, ekuilibri dhe diversiteti i shëndetshëm bakterial, si dhe integriteti më i mirë i barrierës gastrointestinale, është lidhur me uljen e inflamacionit në zorrë, vëren studimi i publikuar në Current Developments in Nutrition . Gastroenterologia Supriya Rao sugjeron që të fokusoheni në një shumëllojshmëri ushqimesh sesa të merrni suplemente. Ajo ju rekomandon të hani 30 burime të ndryshme bimore në javë. Nxitni antioksidantët. Duke pasuruar më shumë burime bimore, trupi forcohet edhe me antioksidantë të vlefshëm: “Këta përbërës të vlefshëm dhe ushqimet që i përmbajnë mbajnë nën kontroll inflamacionin”, thekson Dr. Suzana Blum (Susan Blum). Kjo për shkak se antioksidantët veprojnë kundër radikaleve të lira, dhe parandalojnë dëmtimin e qelizave dhe janë shoqëruar me parandalimin e sëmundjeve kronike si sëmundjet kardiovaskulare. Pini çaj jeshil. Një nga pijet më të njohura dhe efektive anti-inflamatore është çaji jeshil, i cili mund të zëvendësojë kafen tuaj të mëngjesit. Çaji jeshil është i pasur me polifenole, të cilat janë përbërës natyralë që reduktojnë inflamacionin. Të rëndësishme janë edhe katekinat, një përbërës bimor që mbron qelizat nga dëmtimi që luan një rol në plakjen dhe sëmundjet kronike. Përmirësoni cilësinë e gjumit. Gjumi adekuat mund të përmirësojë shumë aspekte të jetës sonë, duke përfshirë rregullimin e inflamacionit. “Nëpërmjet gjumit, trupi ynë pastrohet, ribalancohet dhe shërohet, ndaj është e rëndësishme të mbajmë një orar të qëndrueshëm”, thekson Dr. Suzana Blum (Susan Blum). Në fakt, sipas një studimi të publikuar në Biological Psychiatry , gjumi i shqetësuar është i lidhur me rritjen e shënuesve inflamatorë. Nga z. Erton Duka.

© Copyright | Agjencia Telegrafike Vox