KOMISIONERI I LARTË I OKB-së PËR HAITIN VOLKER TËRK (TÜRK): NEVOJË URGJENTE PËR TË NDALUAR TRAFIKUN E ARMËVE; 4239 VETA U VRANË MIDIS KORRIKUT DHE SHKURTIT; 500 MIJË ARMË NË DUART E BANDAVE KRIMINALE

Gjenevë, Konfederata e Zvicrës | Komisioneri i Lartë i Kombeve të Bashkuara për të Drejtat e Njeriut, Volker Tërk (Türk), ka bërë thirrje për ndalimin e tregtisë së armëve në Haiti dhe për zbatimin e plotë të embargos së dekretuar nga Këshilli i Sigurimit.

Këtë ai e deklaroi sot gjatë prezantimit të raportit të fundit të OKB-së për të drejtat e njeriut në Gjenevë, ku denoncoi se situata në ishullin e Karaibeve ka arritur në një pikë tjetër kritike.

“Raporti ju prezantoi detaje se si përdorimi i armëve të zjarrit të trafikuara po nxit një cikël të mëtejshëm shkatërrimi dhe dhune që çon në shkelje dhe abuzime serioze të të drejtave të njeriut”, tha z. Tërk (Türk).

“Sipas të dhënave të OKB-së, armët ilegale që qarkullojnë në Haiti janë midis 270000 dhe 500000, shumica e tyre në duart e bandave dhe është absolutisht thelbësore që të zbatohet plotësisht embargoja e armëve e Këshillit të Sigurimit, si dhe ngrirja e synuar e aseteve”, shtoi Komisioneri i Lartë.

Më tej në raport thuhet se në periudhën raportuese, midis 1 korrikut 2024 dhe 28 shkurt 2025, 4239 njerëz u vranë dhe 1356 u plagosën dhe se 92% e viktimave u shkaktuan nga përdorimi i armëve të zjarrit.

“Pa veprime të qëndrueshme mbi faktorët që po përjetësojnë këtë kaos, çdo përfitim në siguri ose stabilitet do të jetë i përkohshëm”, përfundoi komisioneri Tërk (Türk).

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit