KUR IVANI VJEN PËRSËRI DUKE MARSHUAR PËR NË SHTËPI.

Nga znj. Ksenia (Kseniya) Kirillova.

Londër, Britani e Madhe | Veteranët nga pushtimi i Ukrainës kërcënojnë të sjellin një epidemi krimi dhe dhune në shtëpi në Rusi. Kremlini shpreson të bashkojë brutalitetin e tyre për të çimentuar më tej kontrollin e tij në pushtet.

Pranohet gjerësisht se Rusia përballet me një rritje të krimit me kthimin e ushtarëve nga fronti, shumë prej të cilëve, do të jenë përfshirë në krime lufte dhe akte të tjera shthurjeje. Krimi paraqet një kërcënim për shoqërinë, i cili është i qartë edhe për “Komunitetin Z” të përkrahësve të luftës ultranacionaliste.

Kanali televiziv konservator i djathtë Cargrad (Tsargrad) paralajmëroi se pjesëmarrësit e Operacionit Special Ushtarak (SVO) mund të kërkojnë hakmarrje pas kthimit të tyre, gjë që do të jetë më e keqe se rebelimi i Prigozhinit.

Një artikull në faqen e internetit të stacionit pohoi: “një kolonë e pestë po përpiqet të ngrejë një konflikt midis trupave të vijës së parë dhe udhëheqjes më të lartë të vendit”, duke identifikuar kolonën e pestë si një grup tradhtarësh misterioz në pozitat e pushtetit.

Cargradi (Tsargradi) është i rëndësishëm sepse u themelua nga i ashtuquajturi oligarku ortodoks Konstantin Malofeev, i cili, ka financuar aktivisht separatistët pro-rusë në Ukrainë që nga aneksimi i Krimesë në vitin 2014 dhe fazat e hershme të luftës në Donbas.

Ndikimi tek presidenti Vladimir Putin i Malofeevit dhe radikalëve të tjerë të krahut të djathtë, si filozofi Aleksandër (Alexander) Dugin dhe shkrimtari Aleksandër (Alexander) Prokhanov, është rritur që nga viti 2022, sipas raporteve që citojnë njerëz të afërt me Kremlinin.

“Administrata e Putinit i ka kërkuar Malofeevit dhe bashkëpunëtorëve të tij që të eksplorojnë konturet e një ideologjie të re”, thuhet në raportet.

Objektivi kryesor i kolonës së pestë të supozuar, sipas kanalit të Malofeevit, është të parandalojë që veteranët të shndërrohen në një elitë të re të Rusisë dhe të inkurajojë rritje të abortit dhe imigrimit, çështje që ai dhe aleatët e tij po kërkojnë … .

Kanali pretendoi se ata janë shqetësime kryesore për ushtarët që kthehen nga fronti dhe veteranët po ndajnë komplote rreth një sekti të gjithëfuqishëm mjekësh që nxjerrin organe fëmijët tanë rusë.

Një grup veteranësh regjistroi një video që sulmonte abortin dhe kërcënonte mjekët e përfshirë, por sondazhet sugjerojnë se është e gabuar të pretendohet se është një çështje kryesore për veteranët e kthyer.

Cargradi iu referua paligjshmërisë së emigrantëve si fokusi i dytë i pakënaqësisë dhe Espanyola, një organizatë e veteranëve dhe ish-dashamirësve të futbollit, deklaroi gatishmërinë e saj për t'i rezistuar etnokriminalitetit, duke kërkuar një hetim për të gjitha diasporat kombëtare në Rusi dhe zyrtarët e korruptuar të lidhur me to.

Ajo argumentoi se duhet të ketë një luftë me kolonën e pestë dhe nuk duhet të lejohet të shtyjë një paqe të turpshme.

“Veteranët duhet të kenë lirinë për të kandiduar për poste dhe për të organizuar drejtësinë e turmës”, tha kanali i lajmeve.

Por Kremlini e di se ndjekja e këshillave të zyrës së Malofeevit dhe përdorimi i ushtarëve për të sulmuar emigrantët, mund të dalë shpejt jashtë kontrollit.

Në tre vitet që nga pushtimi i plotë, veteranët nga fronti kanë vrarë dhe gjymtuar më shumë se 750 njerëz pasi janë kthyer në shtëpi.

Më shpesh, viktimat e tyre ishin të afërm dhe miq, dhe shumica e krimeve ishin të natyrës shtëpiake.

Konsolidimi i atyre me të kaluar kriminale dhe PTSD rreth ndonjë armiku të përbashkët do të ishte jashtëzakonisht i vështirë, ndërsa forcimi i grupeve radikale paraushtarake do të rrezikonte tensione shtesë sociale në të gjithë Rusinë.

Në vend që të integrojë ushtarët e vijës së parë në politikë ose në zbatimin e ligjit, Kremlini po bën gjithçka që është e mundur për t'i ndaluar ata të kthehen në shtëpi.

Komandantët e ushtrisë ruse raportohet se po i detyrojnë ushtarët e mobilizuar të nënshkruajnë kontrata me Ministrinë e Mbrojtjes duke i kërcënuar se do t'i dërgojnë në një sulm mish për top në të cilin shanset e tyre për të mbijetuar janë pothuajse zero.

Përpjekjet për të përmbushur thirrjen e Putinit që veteranët e luftës të bëhen një elitë e re gjithashtu kanë dështuar.

Në zgjedhjet rajonale të shtatorit, pjesëmarrësit në luftën në Ukrainë fituan vetëm 5% të vendeve në parlamentet rajonale të Rusisë, ndërsa shumica dërrmuese e kandidatëve që e identifikonin veten si “veteranët e SVO” nuk ia dolën të kalonin në zgjedhjet paraprake të partisë “Rusia e Bashkuar”.

Në Moskë, të 15 kandidatët ushtarakë humbën votimin paraprak, ndërsa në rajonin kufitar Briansk (Bryansk), Rusia e Bashkuar nuk emëroi asnjë veteran të vetëm të luftës.

Ka pretendime se lidershipi i partive pro-Kremlinit sabotoi planet për t'i bërë veteranët e luftës një elitë të re, madje edhe ata që u zgjodhën nuk ishin në gjendje të merrnin detyrën.

Denis Tadishev (Tadyshev), i cili, u zgjodh kryetar i vendbanimit rural Balyktuyul, për shembull, u detyrua të largohej për në front pasi fitoi votën.

Edhe qeveria duket se nuk ngutet për të rikthyer shëndetin e veteranëve. Ish-ushtarët ankohen se duhet të presin muaj për proteza, madje edhe mediat pro-qeveritare kanë pranuar se shumë prej tyre përfundojnë të pastrehë dhe nuk marrin asnjë kujdes mjekësor.

Inteligjenca ushtarake britanike tha më 14 mars se 160 spitale ruse u mbyllën vitin e kaluar, ndoshta sepse burimet mjekësore po ridrejtoheshin nga sektori civil në atë ushtarak.

Është e pashmangshme që disa të kërkojnë të vërtetën dhe të fillojnë të përbëjnë një kërcënim për autoritetet.

Pjesa ultra-nacionaliste e elitave do të kërkojë të përfitojë nga kjo, duke bërë që autoritetet të kërkojnë mbështetjen e tyre - një proces që tashmë duket se është duke u zhvilluar.

Kanalet Telegram pro-Kremlinit pretendojnë se deri në një të katërtën e deputetëve të rinj të Dumës së Shtetit do të rekrutohen nga veteranët e SVO-së ndërsa autoritetet dhe nacionalistët bashkojnë forcat për të synuar liberalët, emigrantët dhe komunitetin LGBT+.

Kremlini gjithashtu miraton rregullisht slogane nacionaliste dhe lejon grupet radikale të marrin pjesë në ruajtjen e ligjit dhe rendit për të siguruar besnikërinë e tyre.

Por retorika radikale-konservatore nuk rezonon me shumicën e rusëve apo me një numër të konsiderueshëm ushtarësh të kthyer.

Duke ndjekur drejtimin e së djathtës ekstreme, Kremlini nuk do të zvogëlojë zemërimin e shkaktuar nga krimet e veteranëve, por në vend të kësaj mund të ndezë vatra të reja tensioni shoqëror.

Znj. Ksenia (Kseniya) Kirillova është një analiste e fokusuar në shoqërinë ruse, mentalitetin, propagandën dhe politikën e jashtme. Autorja e artikujve të shumtë për CEPA dhe Fondacionin Jamestown, ajo ka shkruar edhe për Këshillin Atlantik, Stratfor dhe të tjerë.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit