___.png)
Londër, Mbretëria e Bashkuar | Mbretëria e Bashkuar mbajti stërvitjen e saj të parë të luftës në hapësirë të koduar “Luftëtari Hapësinor” në Qendrën e Eksperimentimit të Mbrojtjes dhe të Uorgemingut (Wargaming), të vendosur në Parkun Sauthuik (Southwick), në Hempshaiër (Hampshire).
Një deklaratë për shtyp e botuar nga Forca Ajrore Mbretërore (RAF) më 29 korrik 2024 tha se personeli nga Ministria e Mbrojtjes (MM), industria dhe partnerët dhe aleatët ndërkombëtarë morën pjesë në stërvitjen e luftës.
Komandanti i Komandës Britanike të Hapësirës, gjeneralmajor Poll (Paul) Tedman, mbikëqyri stërvitjen.
Stërvitja ushtarake eksploroi se si aftësitë e inteligjencës, mbikëqyrjes dhe zbulimit (ISR) të Ministrisë së Mbrojtjes së Mbretërisë së Bashkuar, të tilla si ato të programit ISTARI, i cili pritet të sigurojë një grup satelitësh mbrojtës për ISR me bazë në hapësirë deri në vitin 2031, mund të funksionojnë në sinergji me aftësi ISR të hapësirës komerciale.
Interpretimi i rrjetit hapësinor britanik ISTARI: Forcat Ajrore nuk dhanë detaje specifike se si u zhvilluan kjo stërvitje luftarake dhe cili ishte rezultati.
Ministria Britanike e Mbrojtjes po përpiqet të forcojë mbikëqyrjen e saj të hapësirës në pritje të një konflikti që mund të përshkallëzohet dhe të arrijë në hapësirë, veçanërisht duke përfshirë partnerët industrialë.
Kjo pasqyrohet në deklaratën e lëshuar nga komandanti i Komandës Britanike të Hapësirës.
Komandanti i Komandës Hapësinore të Mbretërisë së Bashkuar tha: “Luftëtari Hapësinor (Space Warrior) ka dhënë udhëzime jetike se cilat aftësi ISR në orbitë na duhen dhe në çfarë mase.
Dhe, më e rëndësishmja, ai konsideroi gjithashtu nëse ne duhet të zotërojmë aftësinë, ta aksesojmë atë përmes tregtisë ose të bashkëpunojmë me aleatët.
Unë u jam mirënjohës partnerëve tanë të industrisë dhe aleatëve ushtarakë për pjesëmarrjen, kontributin dhe mbështetjen e tyre. Hapësira është një sport ekipor.
Z. Elln Entrobas (Allen Antrobus), kryetar i Komitetit të Sigurisë dhe Mbrojtjes së Hapësirës në Mbretërinë e Bashkuar, e vlerësoi ngjarjen si një moment historik të rëndësishëm.
“Stërvitja e parë e Luftës Hapësinore e Komandës së Mbretërisë së Bashkuar për Luftëtarin Hapësinor ishte një ngjarje në kohën e duhur dhe e drejtuar mirë, ndërsa ne shkojmë drejt Rishikimit të ardhshëm Strategjik të Mbrojtjes.
Përfshirja e kolegëve nga e gjithë industria ishte një hap i rëndësishëm përpara në demonstrimin e përkushtimit të Ministrisë së Mbrojtjes për të dëgjuar dhe angazhuar bazën më të gjerë industriale të mbrojtjes”, tha z. Entrobas (Antrobus).
Komanda Hapësinore e Mbretërisë së Bashkuar ka marrë pjesë në disa stërvitje ndërkombëtare dhe lojëra luftarake që nga themelimi i saj në vitin 2021.
Në njoftimin për shtyp thuhet se “Luftëtari i Hapësirës” do të jetë një ngjarje e rregullt që do të forcojë lidhjet dhe mirëkuptimin midis Komandës Hapësinore të Mbretërisë së Bashkuar, partnerëve, aleatëve të saj dhe industrisë.
Stërvitjet e luftës hapësinore të organizuara nga Mbretëria e Bashkuar janë të rëndësishme sepse shënojnë ngjarjen inauguruese të vendit në këtë sektor, veçanërisht kur merret parasysh përfshirja e rregullt e saj në stërvitje të ndryshme luftarake në të tre fushat e ajrit, detit dhe tokës.
Në fillim të këtij viti, forcat britanike morën pjesë në stërvitjet më të mëdha ushtarake të NATO-s për një brez. Në të vërtetë, trupat britanike udhëhoqën stërvitjet luftarake të NATO-s në kufirin e Estonisë me Rusinë në një shfaqje spektakolare të forcës.
Vitet e fundit, Britania e Madhe ka filluar të studiojë seriozisht mbrojtjen e hapësirës.
Në tetor 2022, një komitet parlamentar britanik i kërkoi qeverisë të caktojë një Ministër për Hapësirën për të ofruar drejtim të qartë të centralizuar dhe llogaridhënie në avancimin e ambicieve civile dhe të mbrojtjes së Mbretërisë së Bashkuar në hapësirë.
Në vitin 2022, Ministria e Mbrojtjes e Mbretërisë së Bashkuar zbuloi Strategjinë e Hapësirës së Mbrojtjes, duke përshkruar planet për vitet në vijim që theksojnë kryesisht aftësitë ISR në përgjigje të sfidave kundërshtare në hapësirë.
Shqetësimet në rritje rreth cenueshmërisë së mundshme të sistemeve hapësinore ushtarake kanë bërë që Mbretëria e Bashkuar të investojë në zhvillimin dhe blerjen e aftësive të veta ISR të bazuara në hapësirë.
Strategjia hapësinore e Mbretërisë së Bashkuar merr formë: Strategjia e parë hapësinore e Mbrojtjes së Mbretërisë së Bashkuar u publikua në muajin shkurt të vitit 2022 për të adresuar kërcënimet në rritje.
Strategjia u fokusua në mënyrën se si mbrojtja do të mbronte interesat kombëtare të Mbretërisë së Bashkuar në hapësirë në një epokë kërcënimesh të bazuara në hapësirë dhe rrezikut të afërt të luftës në hapësirë.
Investimi prej 1.4 miliardë £ përfshin një angazhim prej 968 milion £ gjatë 10 viteve për të ofruar programin ISTARI, një sistem shumë-satelitësh i cili pritet të ofrojë mbikëqyrje dhe inteligjencë të shtuar globale për operacionet ushtarake.
Gjithashtu ndau 61 milionë paundë të tjerë për të studiuar përdorimin e teknologjisë së avancuar të komunikimit lazer, për të transmetuar të dhëna nga hapësira në Tokë me shpejtësi të krahasueshme me brezin e gjerë super të shpejtë.
Sateliti i parë është planifikuar të lëshohet nga Komanda Britanike e Hapësirës këtë vit.
Si pjesë e Programit ISTARI, do të krijohet një rrjet satelitësh të rinj, i pari prej të cilëve do të jetë Tyche.
Bëhet fjalë për një satelit kërkimor dhe zhvillimi 150 kilogramësh që do të kalojë jetën e tij pesëvjeçare në orbitën e ulët të Tokës.
Tyche – Fonte X: Tyche ka një sensor elektro-optik, një kamerë me rezolucion të lartë që e lejon atë të marrë pamje të sipërfaqes së Tokës gjatë ditës nga hapësira.
Ai u projektua dhe u ndërtua në Mbretërinë e Bashkuar sipas një kontrate prej 22 milionë paundësh me Surrey Satellite Technology Ltd.
Do të lëshohet nga SpaceX nga Baza Hapësinore Vandenberg, Kaliforni.
Një nga objektivat kryesore të strategjisë së programit ISTARI është forcimi i marrëdhënieve dypalëshe dhe shumëpalëshe me partnerët Five Eyes të Mbretërisë së Bashkuar (Australi, Kanada, Zelanda e Re, Shtetet e Bashkuara dhe Mbretëria e Bashkuar), në veçanti me Shtetet e Bashkuara si partner kryesor.
Dëshmi e mëtejshme e rritjes së investimeve në sistemet hapësinore janë përpjekjet e Mbretërisë së Bashkuar për të rritur aftësitë e saj të imazhit satelitor të bazuar në hapësirë pas dekadash varësie nga SHBA.
Pasi të përfundojë lëshimi i Tyche, Mbretëria e Bashkuar do të përqendrohet në yjësinë e Radarit me Hapje Sintetike (SAR) Oberon, që do të debutojë në vitin 2025, dhe një sistem tjetër të Vëzhgimit të Tokës (EO), Juno, në 2026.
Në muajin dhjetor të vitit 2023, Australia, Mbretëria e Bashkuar dhe Shtetet e Bashkuara njoftuan bashkëpunimin e tyre për të zhvilluar një aftësi të avancuar të radarit në hapësirë të thellë, e cila do të mundësonte zbulimin, gjurmimin dhe karakterizimin e objekteve në orbitën gjeosinkrone dhe më gjerë.
Të tre vendet po planifikojnë të instalojnë sensorë të të gjitha motit që mbështesin këtë aftësi.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comentários