MINISTRI I MBROJTJES I REPUBLIKËS SË SHQIPËRISË PIRRO VENGU FOLI SHKOQUR RRETH MARRËVESHJES SË NËNSHKRUAR NË FUSHËN E MBROJTJES MES SHQIPËRISË + KOSOVËS + KROACISË.

Tiranë, Shqipëri | Ministri i Mbrojtjes, i Republikës së Shqipërisë, Pirro Vengu, deklaroi se marrëveshja e nënshkruar në fushën e mbrojtjes mes Shqipërisë, Kosovës dhe Kroacisë nuk është një marrëveshje që parashikon një qasje agresive ndaj dikujt tjetër në rajon, por është një aleancë për rritjen e kapaciteteve të mbrojtjes.

Ministri Vengu foli shkoqur për marrëveshjen e nënshkruar dje mes Shqipërisë, Kroacisë dhe Kosovës në fushën e mbrojtjes, ndërsa iu përgjigj edhe reagimeve që ka ngjallur kjo marrëveshje në Serbi, gjatë një prononcimi.

“Kjo nuk është një marrëveshje që parashikon një qasje agresive ndaj dikujt tjetër në rajon.

Kam parë edhe reagimet shpeshherë të medieve që e perceptojnë si një kërcënim ndaj Serbisë apo çdokujt tjetër në rajon. Nuk është e vërtetë.

Ne nuk e shohim veten si një aleancë që ndërtohet kundër dikujt, por është një aleancë për mbrojtje dhe bashkëpunim në fushën e sigurisë dhe mbrojtjes që këto tre vende të rrisin kapacitetet e tyre të mbrojtjes”, tha ministri Vengu.

“Serbia e ka humbur shansin për t’u konsultuar për këtë çështje nga momenti që Serbia ka më shumë se dy vite që zbaton një politikë të ‘karriges bosh’ në takimet tona rajonale.

Serbia ka bojkotuar të gjitha takimet e Kartës së Adriatikut, mbledhjet e Ministrave të Mbrojtjes së rajonit e kështu me radhë.

Praktikisht nuk mund të na kërkojë dikush të konsultohet me ne për këtë çështje kur nuk është në takimet ku ne flasim për këtë çështje.

Shqipëria dhe Kroacia, si dy vende të anëtarësuara në NATO konsiderohen vende aleate me njëfarë eksperience dhe kanë një lexim të njëjtë për rajonin.

Nuk kanë pse të konsultohen kur bëjnë një marrëveshje të përbashkët me Kosovën, e cila njihet nga Kroacia.

Nëse Serbia do të kishte dashur të konsultohej mjafton të vinte në tryezat e bashkëpunimit rajonal, aty ku është e ulur edhe Kosova me të drejta të njëjta dhe Kroacia po ashtu”, tha ministri Vengu.

“Marrëveshja është një aleancë me Shqipërisë, Kroacisë dhe Kosovës për të pasur një bashkëpunim më të thelluar në fushën e sigurisë dhe mbrojtjes bazuar në tre shtylla kryesore.

Së pari synohet bashkëpunimi për të rivitalizuar industrinë ushtarake në vendet tona, për të bërë prokurime të përbashkëta, marrë dhe blerë pajisje për të treja vendet, si dhe të kemi edhe një rakordim të nevojave për tu armatosur dhe për të rritur kapacitetet në fushën e mbrojtjes.

Element thelbësor i kësaj marrëveshje ka të bëjë e vëmendjen që ne kërkojmë që NATO të ketë përkundrejt sigurisë në Kosovë si dhe sigurisë dhe stabilitetit në gjithë rajonin tonë”, tha ministri Vengu.

“Kroacia dhe Shqipëria kanë mbështetur rritjen e trupave të KFOR në Kosovë, sikundër edhe rritjen e kontingjenteve tona në misionin e BE-së në Bosnjë Hercegovinë.

Garancia e dytë e sigurisë së Kosovës vjen përmes zhbllokimit të dialogut politik mes Kosovës dhe Serbisë dhe anëtarësimit të Kosovës në të gjitha platformat rajonale të sigurisë.

Ne kemi marrë edhe shprehjen e interesit nga kolegët bullgarë për t’u përfshirë, sepse edhe ata kanë të njëjtin lexim të kërcënimeve në rajon, e njohin Kosovën dhe rëndësinë që ka integriteti i saj.

E mirëpresim faktin nëse ka edhe vende të tjera që interesohen”, tha ministri Vengu.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit