NJË DELEGACION I HAMASIT DO TË PRITET NESËR NË EGJIPT PËR BISEDIMET E ARMËPUSHIMIT NË GAZA | HAMASI KËRKON LIRIMIN E MBI 2 MIJË TË ARRESTUARVE PAS SULMEVE TERORISTE TË 7 TETORIT 2023 KUNDËR CIVILËVE.

Kajro, Egjipt | Një delegacion negociator i lëvizjes islamike palestineze Hamas, i kryesuar nga Khalil al Haia (Hayya), do të udhëtojë nesër në Kajro me ftesë të Egjiptit për të diskutuar një marrëveshje të re për Rripin e Gazës.

Një burim palestinez i njohur me negociatat e armëpushimit në Gaza i tha të përditshmes pan-arabe saudite “Asharq News” se delegacioni i Hamasit do të diskutojë me zyrtarët egjiptianë zhvillimet e fundit në Egjipt dhe përpjekjet e Katarit për të arritur një marrëveshje.

I njëjti burim konfirmoi gatishmërinë e Hamasit për të gjetur një kompromis për shkëmbimin e të burgosurve dhe për të përfunduar fazën e dytë të marrëveshjes së armëpushimit.

“Marrëveshja është e mundur nëse Izraeli e pranon atë, pasi Hamasi ka dhënë pëlqimin e tij për propozimin e fundit egjiptiano-katar - tha burimi - duke theksuar se grupi islamik është i gatshëm të pranojë çdo propozim të ri për pengjet, me kusht që të përfshijë një armëpushim, të kalojë në fazën e dytë dhe të përfundojë zbatimin e protokollit humanitar”.

Sipas burimeve të cituara nga enti mediatik “Asharq News”, në fund të javës së kaluar ndërmjetësit e negociatave propozuan që Hamasi të lironte tetë pengje të gjallë dhe po aq të vdekur, në këmbim që Izraeli të lironte 180-220 të burgosur palestinezë që vuanin dënime të përjetshme dhe dënime të larta, si dhe mbi 2000 të arrestuar në Gaza pas sulmeve terroriste të 7 tetorit.

Më tej, armëpushimi duhet të zgjatet nga 50 në 70 ditë, me kusht që çështjet e fazës së dytë të diskutohen në javën e dytë pas hyrjes në fuqi të marrëveshjes.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit