___.png)
Tel Aviv, Izrael | Znj. Shani Goren, një izraelite që kaloi gati dy muaj si peng i Hamasit në Rripin e Gazës përpara se të lirohej, foli sot për luftën e saj për të jetuar përsëri, gjatë një mbledhjeje në Paris, të të afërmve të pengjeve nga kibuci Nir Oz, një nga ata që u morën gjatë sulmeve më të rënda nga terroristët e Hamasit më 7 tetor 2023.
“Kanë kaluar 343 ditë që nga ajo e shtunë kur më rrëmbyen nga shtëpia ime në kibucin Nir Oz, vendi që mendoja se ishte vendi më i sigurt në botë”, tha znj. Shani Goren në këtë tubim të organizuar me Crif (Këshilli i Fondacioneve Hebraike të Francës) në lagjen hebraike të Marais, në qendër të Parisit.
Gruaja e re, e cila kaloi 55 ditë në robëri në Gaza, ishte një nga 100 pengjet e liruara gjatë armëpushimit njëjavor midis Izraelit dhe Hamasit në fund të nëntorit 2023.
“Zemra ime dhe një pjesë e madhe e imja janë ende atje, në atë vend të tmerrshëm robërie në Gaza”, u tha ajo dhjetëra njerëzve, duke përfshirë banorët e kibucit Nir Oz, të mbledhur pas një pankarte ku shkruhej lironi të gjithë pengjet, disa prej të cilëve ushtria izraelite ka njoftuar se janë vrarë.
“U ktheva, zgjohem në mëngjes, fle natën - shumicën e kohës jo - ha, pi. Por kjo nuk është jetë, është diçka larg jetës. Miqtë e mi që ishin më afër kibucit janë ende atje. Më mungojnë çdo moment të ditës”, tha znj. Goren, fjalët e së cilës u përkthyen nga hebraishtja.
“Çdo ditë kalon si një përjetësi, çdo orë është e pafund. Duhet t'i sjellim në shtëpi. Tani”, përfundoi ajo, ndërsa njerëzit e mbledhur atje thërrisnin: “Arshav”, (“tani” e thënë në hebraisht).
Kibbutz Nir Oz, shumë afër Rripit të Gazës, pagoi një çmim të rëndë në sulmin e Hamasit, me rreth 30 të vdekur dhe më shumë se 70 pengje, disa prej të cilëve vdiqën në robëri.
Një tjetër banore e Nir Oz, znj. Jamit Avital foli për ndjenjën e saj të fajita sepse ne jemi këtu në Paris dhe ata janë atje dhe u kërkoi njerëzve të vepronin për të liruar pengjet.
“Nuk mund ta duroj më këtë”, tha ajo e përlotur.
Sulmi i paprecedentë terrorsit i Hamasit ndaj Izraelit më 7 tetor 2023 rezultoi në vdekjen e 1205 personave, kryesisht civilë, sipas një raporti të entit mediatik AFP, bazuar në shifrat zyrtare izraelite.
Nga 251 personat e rrëmbyer atë ditë, 97 mbahen ende në Gaza, prej të cilëve 33 u shpallën të vdekur nga ushtria izraelite.
Lufta e nisur si hakmarrje nga Izraeli për shkatërrimin e Hamasit në Gaza ka lënë më shumë se 41000 të vdekur, kryesisht gra dhe fëmijë, sipas ministrisë së shëndetësisë të qeverisë së lëvizjes islamike palestineze.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments