PËR 12 VJET PAPA FRANÇESKU KA THËNË: MOS HARRONI TË LUTENI PËR MUA.

Vatikan | Ndërsa Papa Françesku përgatitej të kalonte 12 vjetorin e zgjedhjes së tij në spitalin Xhemeli (Gemelli) të Romës, njerëzit në Vatikan dhe në mbarë botën po i përgjigjeshin kërkesës së tij më të shpeshtë personale.

“Që nga fillimi i pontifikatit të tij, ne kemi dëgjuar Papa Françeskun të na kërkojë të mos harrojmë të lutemi për të dhe kjo është ajo që ne po bëjmë”, tha kardinali José Tolentino de Mendonça, prefekt i Dikasterit për Kulturën dhe Arsimin, ndërsa udhëhoqi mijëra njerëz që lutnin rruzaren për Papën më 10 mars 2025 në Sheshin e Shën Pjetrit.

“Nuk janë vetëm të krishterët ata që po e bëjnë këtë, por besimtarët e feve të tjera dhe madje edhe shumë jobesimtarë gjithashtu po bashkojnë zemrat e tyre rreth Papa Françeskut”, tha kardinali.

Papa Françesku e ka bërë kërkesën për lutje një shenjë dalluese të papatit të tij dhe një mënyrë standarde për të përfunduar një letër apo fjalim.

Kur kardinali 76-vjeçar Jorge Mario Bergoglio i Buenos Aires-it, Argjentinë, u zgjodh për të pasuar Papa Benediktin XVI më 13 mars 2013 dhe doli në ballkonin e Bazilikës së Shën Pjetrit, fjalët e tij mahnitën turmën.

“Përpara se peshkopi të bekojë popullin e tij, ju kërkoj t'i luteni Zotit që ai të më bekojë - lutja e njerëzve që kërkon një bekim për peshkopin e tyre. Le të bëjmë, në heshtje, këtë lutje: lutjen tuaj mbi mua”, tha ai dhe u përkul për të marrë bekimin.

Dhe përsëri, para se të thoshte natën e mirë, ai i tha turmës: “Lutuni për mua”.

Ndoshta nuk ka kaluar asnjë ditë që atëherë që ai të mos e ketë bërë kërkesën me zë apo me shkrim.

Katër muaj pas zgjedhjes së tij, në fluturimin e tij nga Rio de Zhaneiro, Brazil, një gazetar e pyeti atë pse ai kërkonte gjithmonë lutjet e njerëzve.

“Nuk është normale, ne nuk jemi mësuar të dëgjojmë një papë të pyesë aq shpesh sa njerëzit të luten për të”, tha gazetari.

“Këtë e kam kërkuar gjithmonë”, u përgjigj Papa.

“Kur isha prift, pyesja, por më rrallë. Fillova të pyes më shpesh kur punoja si peshkop, sepse e ndjej se nëse Zoti nuk ndihmon në këtë punë për të ndihmuar popullin e Perëndisë që të ecë përpara, kjo nuk mund të bëhet”.

“Unë jam vërtet i vetëdijshëm për kufizimet e mia të shumta, për shumë probleme, për të qenë gjithashtu një mëkatar - siç e dini - dhe unë duhet ta kërkoj këtë”, tha ai.

“Është një zakon, por një zakon që më del nga zemra”, tha ai.

Papa Françesku gjithashtu shpesh falënderon njerëzit për lutjet e tyre.

“Dëshiroj t'ju falënderoj për lutjet, të cilat ngrihen drejt Zotit nga zemrat e kaq shumë besimtarëve nga shumë pjesë të botës”, shkroi Papa në tekstin e tij për lutjen e Engjëllit më 2 mars 2025.

“Ndjej gjithë dashurinë dhe afërsinë tuaj dhe, në këtë moment të veçantë, ndihem sikur jam i bartur dhe i mbështetur nga i gjithë populli i Perëndisë. Faleminderit të gjithëve”.

Dhe ndërsa asnjë foto e Papa Françekut nuk është publikuar që kur ai hyri në spital, zëri i tij i munduar u transmetua në sheshin e Shën Pjetrit më 6 mars 2025 në një mesazh audio duke falënderuar besimtarët e mbledhur për lutjet e tyre.

I shtruar në spital që nga 14 shkurti i vitit 2025 me bronkit dhe vështirësi në frymëmarrje, Papa Françesku më vonë u diagnostikua me pneumoni të dyfishtë.

Mjekët e tij u thanë gazetarëve se ai vuante nga sëmundje kronike të mushkërive: bronkektazi dhe bronkit astmatik, të shkaktuar nga vite të tëra problemesh të frymëmarrjes dhe periudhave të përsëritura të bronkitit.

Në autobiografinë e tij, Papa Françesku shkroi për operacionin që iu nënshtrua në moshën 20-vjeçare për të hequr lobin e sipërm të mushkërisë së djathtë pasi pësoi një infeksion të rëndë respirator.

“Ishte jashtëzakonisht e dhimbshme. Jashtëzakonisht”, tha ai.

Kur shkruajnë ose flasin për operacionin në mushkëri të Papës, njerëzit shpesh supozojnë gabimisht se mjekët kishin hequr të gjithë mushkërinë e djathtë. Madje ishte një çështje në konklavën e vitit 2013 që e zgjodhi atë.

“Gjatë pushimit të drekës mes votimit të tretë dhe të katërt të konklavës - shkroi ai - një grup kardinalësh evropianë e ftuan atë të ulet me ta. Ata filluan të bënin aq shumë pyetje për kaq shumë tema sa e gjeta veten duke menduar: Hah, duket si një provim”.

Në fund të vaktit, tha ai, një kardinal që fliste spanjisht e pyeti: “A të mungon një mushkëri”?

Pasi shpjegoi se vetëm lobi i sipërm ishte prerë në vitin 1957, Papa Françesku kujtoi se kardinali u bë i kuq, shqiptoi një sharje dhe shtrëngoi dhëmbët: “Këto manovra të minutës së fundit”, bërtiti ai.

Atëherë fillova të kuptoja ai po konsiderohej seriozisht si një kandidat për të pasuar Papa Benediktin. Ndodhi atë mbrëmje me votën e pestë të konklavës.

Kisha Katolike në Argjentinën e lindjes së Papa Françeskut planifikoi të festonte 12-vjetorin e Papës më 13 mars 2025 me mesha të veçanta në çdo dioqezë.

Kryepeshkopi Marselo Kolombo (Marcelo Colombo) i Mendozës, president i konferencës së peshkopëve argjentinas, tha se mesha, përveç lutjeve për rimëkëmbjen e vazhdueshme të Papës, do të ishte një dëshmitar publik i mirënjohjes sonë për përkushtimin e tij bujar, i cili, ka dhënë fryte të bollshme të dashurisë baritore ndër vite.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit