___.png)
Tiranë, Shqipëri | Zgjerimi i autostradës Tiranë-Durrës me nga dy korsi në secilën anë, ku njëra do të shërbejë për emergjencat do t’i kushtojë buxhetit të shtetit 298.8 milionë €.
Puna për zgjerimin e autostradës nis me përfundimin e sezonit veror në 2 lotet e para, Këthesa Kamzës-Vorë dhe Vorë-Sukth, për të cilët janë shpallur edhe fituesit.
Në dokumentin e rishikuar të Politikave Prioritare 2025-2027, i cili është publikuar në Fletoren Zyrtare, janë saktësuar edhe vlerat e reja financiare për një sërë projektesh të mëdha.
Konkretisht rruga e re Tiranë-Ndroq-Plepa, që mund të shërbej si alternative nëse autostrada Tiranë-Durrës bëhet me pagesë, ka një faturë të dyfishuar në raport me planifikimin fillestar.
Kostoja për ndërtimin e saj është rritur në 87 milionë €, nga 39.8 milionë € që ishte.
E njëjta gjë ka ndodhur edhe me projektin për anashkalesën (baypass) e Elbasanit që është futur në listën e prioriteteve të matururara.
Kostoja fillestare ishte planifikuar në 97.3 milionë €, ndërsa tashmë ka arritur në 240 milionë €.
Me faturë të lartë financiare është Korridori VIII. Edhe pse nuk specifikohet burimi i financimit nëse do të jetë tërësisht financim i shtetit apo me ndihmë të ndërkombëtarëve, fatura për ndërtimin e aksit Rrugor Elbasan-Lekaj është parashikuar të jetë 360 milionë €.
Nga lista e prioriteteve të maturuara është hequr Aeroporti i Sarandës pasi ka ndryshuar vendndodhja për në Gjirokastër dhe është shtuar projekti i ri i anashkalesës (baypass) së Sarandës me vlerë 34 milionë €.
Lista fillestare e prioriteteve ka ndryshuar jo vetëm për vlerat por edhe për projektet që janë shtuar ose hequr.
Në dokumentin e miratuar 5 muaj më parë projekt i maturuar, pra që ishte në fazë të avancuar ishte edhe hidrocentrali i Skavicës, por me ndryshimet e bëra Skavica me vlerë investimi 800 milionë € ka kaluar në listën e projekteve pjesërisht e maturuar.
Në vend numëro është edhe projekti për të vënë në punë TEC-in e Vlorës, apo investimi strategjik për ndërtimin e Hekurudhës Durrës-Prishtinë prej 750 milionë eurosh. Projekte këto që janë në stadin pjesërisht të maturuar.
ZGJERIMI I AUTOSTRADËS TIRANË-DURRËS
Vlera fillestare - 205.000,000 €.
Vlera e re - 298.860,000 €.
Diferenca - +93.860,000 €.
RRUGA E RE TIRANË-NDROQ-PLEPA.
Vlera fillestare - 39.827,760 €.
Vlera e re - 87.000,000 €.
Diferenca - 47.172,240 €.
ANASHKALESA E (BAYPASS) E ELBASANIT.
Vlera fillestare - 97.300,0000 €.
Vlera e re - 240.000,000 €.
Diferenca - +142.700,000 €.
Nga z. Erton Duka.
© Copyright | Agjencia Telegrafike Vox
Ne të njohim me botën | www.007vox.com | Burimi yt i informacionit
Comments