SEKRETARI RUS I KËSHILLIT TË SIGURIMIT SERGEI SHOIGU BËRI NJË UDHËTIM NË KORENË E VERIUT PËR TU TAKUAR ME DIKTATORIN KIM JONG UN PËR TË FORCUAR MARRËDHËNIET MIDIS RUSISË DHE KORESË SË VERIUT.

Phenian, Koreja e Veriut | Sekretari rus i Këshillit të Sigurimit Sergei Shoigu ka bërë një udhëtim në Korenë e Veriut për t'u takuar drejtpërdrejt me Kim Jong Un dhe për t'i përcjellë disa mesazhe.

Së pari, Rusia synon të respektojë dispozitat e partneritetit strategjik që të dy vendet nënshkruan qershorin e kaluar, duke përfshirë atë të mbrojtjes së ndërsjellë.

Së dyti, sekretari Shoigu shprehu mirënjohjen e presidentit Putin për kreun e Koresë së Veriut për mbështetjen e qëndrimit rus për çështjen ukrainase.

Më pas ata folën për më shumë se dy orë për çështje të paspecifikuara sigurie, konfliktin ruso-ukrainas dhe fillimin e dialogut midis Moskës dhe Uashingtonit.

Në tavolinë, në fakt, ishte edhe sistemi i ri raketor anti-ajror i sapo testuar nga Koreja e Veriut që diktatori Kim mund t'ia dorëzonte Moskës.

“Dëshiroj t'ju përcjell urimet dhe përshëndetjet më të ngrohta të presidentit rus Vladimir Putin. Ai i kushton vëmendjen më të madhe zbatimit të marrëveshjeve të arritura me ju”, filloi ligjërimin sekretari Shoigu menjëherë pas takimit me diktatorin Kim.

Nga ana e tij, diktatori i Koresë së Veriut premtoi mbështetje të palëkundur për Rusinë në luftën në Ukrainë.

Kujtojmë se Koreja e Veriut akuzohet nga Kievi, Seuli dhe Uashingtoni se ka vendosur mijëra ushtarë për të luftuar kundër forcave ukrainase në rajonin rus të Kurskut.

Udhëtimi i sekretarit Shoigu në Phenian mund të lidhet me përgatitjet për vizitën e diktatorit Kim në Rusi.

Në çdo rast, Koreja e Veriut i ka furnizuar Moskës një sasi të madhe armësh konvencionale dhe vjeshtën e kaluar dërgoi gjithashtu rreth 10000-12000 trupa në front, sipas zyrtarëve të inteligjencës së ShBA-ës, Koresë së Jugut dhe Ukrainës.

Koreja e Jugut, Shtetet e Bashkuara dhe të tjerët dyshojnë se diktatori Kim po merr ndihmë ekonomike dhe ushtarake nga Kremlini në këmbim të furnizimeve me armë dhe trupa.

Dhe nuk mund të përjashtohet që Koreja e Veriut do të rrisë mbështetjen e saj për Rusinë për të marrë sa më shumë përfitime nga Putini përpara përfundimit të luftës.

Duke përkuar me mbërritjen e ministrit Shoigu në Phenian, Koreja e Veriut njoftoi se kishte testuar raketa të reja kundërajrore dhe kërcënoi se do të merrte masa drastike kundër Shteteve të Bashkuara dhe Koresë së Jugut në përgjigje të stërvitjeve të përbashkëta vjetore ushtarake “Mburoja e Lirisë”.

Agjencia Qendrore Koreane e Lajmeve raportoi se diktatori Kim mbikëqyri personalisht testimin e raketave të reja, duke i quajtur ato një sistem tjetër i rëndësishëm i armëve mbrojtëse.

Z. Ahn Chan Il, një dezertor nga Koreja e Veriut, i kthyer në studiues, i cili, drejton Institutin Botëror për Studimet e Koresë së Veriut, i tha agjenicisë së lajmeve “AFP” se lëshimi i fundit i Phenianit dukej se ishte një provë e armëve që do të eksportoheshin në Rusi dhe që Moska do t'i përdorë në Ukrainë.

Mes gjithë kësaj, Koreja e Veriut ka paralajmëruar Japoninë kundër vendosjes së raketave me rreze të gjatë në Kyushu - më jugori nga katër ishujt kryesorë të arkipelagut japonez - siç parashikohet nga planet e Tokios për mars 2026, duke thënë se një aftësi e tillë sulmi do të çojë në një përshkallëzim të mëtejshëm të tensioneve në Azinë Verilindore.

Qeveria japoneze po shqyrton vendosjen e raketave me rreze të gjatë veprimi në Kyushu, si pjesë e përpjekjeve për të përvetësuar aftësi kundërgoditjes për të goditur objektivat e armikut në rast emergjence.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit