SHBA KA NGRITUR DYSHIME SE HUAWEI KA NË ZOTËRIM NJË ÇIP QË NUK MUND TA PRODHONTE.

Uashington, Amerikë | Qeveria amerikane po kërkon informacione të reja mbi Huawei Mate 60 Pro, një smartphone kinez me një çip të avancuar.

Telefoni i ri celular ka një procesor 5G Kirin 9000s, dhe ka shqetësuar SHBA-në, sepse konsiderohet shumë i avancuar, rezultat i marrë pavarësisht kufizimeve që Uashingtoni ka vendosur për të bllokuar bashkëpunimin mes kompanive amerikane dhe kineze të teknologjisë.

Këshilltari i Sigurisë Kombëtare, Xheik Sallivan (Jake Sullivan) pranoi se SHBA-ve u duhen “më shumë informacion mbi përbërjen”, e pajisjes elektronike për të kuptuar nëse disa pjesë teknologjike kanë arritur të anashkalojnë kufizimet amerikane për mikroçipet.

Në vitin 2019, qeveria amerikane i ndaloi kompanitë amerikane t'i shesin softuer dhe pajisje kompanisë kineze Huawei. Uashingtoni kishte përmendur shqetësimet e sigurisë së brendshme si sulmet e mundshme kibernetike dhe spiunazhin.

Krijimi i një çipi të avancuar për 5G do të ishte një sukses i madh për kompaninë kineze Huawei, dhe një thirrje zgjimi për amerikanët.

Kur kompania kineze prezantoi produktin muajin e kaluar, nuk u dhanë shumë informacione në lidhje me mikroçipin, dhe në faqen zyrtare të kompanisë Huawei mungonin shumë detaje.

Nga z. Erton Duka.

© Copyright | Agjencia Telegrafike Vox