TIRANË: FORTLUMTURIA E TIJ JOAN PELUSHI U FRONËZUA SI KRYEPESHKOP I TIRANËS + DURRËSIT + I MBARË SHQIPËRISË | URIME!

Tiranë, Shqipëri | Sot, në Tiranë, në Katedralen Ngjallja e Krishtit u zhvillua ceremonia e fronëzimit të Fortlumturisë së Tij Joan Pelushi si Kryepeshkop i Tiranës, Durrësit dhe gjithë Shqipërisë.

“Falenderojmë dhe nderojmë martirët e lirisë që përhapën dritën e besimit në trevat ku jetojmë, një listë e gjatë të cilën do ta kujtojmë me nderim e mirënjohje.

Gjatë gjysmës së dytë të shekullit XX kisha u përball me persekutimin e egër komunist.

E gjitha infrastruktura materiale e shpitërore u shkatërruar pjesërisht apo plotësisht.

Kishat e shkatërruan nga themelet (…) Diktatura shkatërroi muret e jashtme të kishave, por nuk mundi të shkatërrojë zemrat e besimit.

Në kohë kritike Perëndia vizitoi kishën tonë, nderoj kujtimin e paraardhësve të mi, në listën e gjatë përmend dy personalitete të shquara.

Im Zot Fan Noli, ishte njeriu i duhur. Ai ishte pajisur nga perëndia me talente të jashtëzakonshme, dha kontribut për ndërgjegjësimin kombëtar. Në kohë rekord ai pajisi kishën me librat kryesorë”, deklaroi Fortlumturia e Tij, Kryepeshkopi Joan.

Fortlumturia e Tij Joan bëri publike shtatë shtylla themelore të misionit të tij të ri si kreu i Kishës Shqiptare:

1- Ruajtjen e Traditës së Shenjtë.

2- Forcimin e unitetit brenda Kishës.

3- Ruajtjen e ekuilibrit midis “Ungjillit të Mbretërisë” dhe “Ungjillit Social”.

4- Mbrojtjen e vlerave të martesës dhe të familjes.

5- Ruajtjen dhe forcimin e bashkëjetesës fetare në Shqipëri.

6- Nxitjen e rinisë për të dashur atdheun e tyre dhe për të mos e braktisur atë.

7- Kultivimin e marrëdhënieve me të gjitha Kishat dhe bashkësitë e tjera fetare.

“Personalisht do të përpiqem me gjithë fuqinë time t’i shërbej grigjës që më është besuar nga Perëndia, duke pasur gjithmonë parasysh fjalët e Zotit se 'Biri i njeriut nuk erdhi për t’u shërbyer, por për të shërbyer'”, tha Fortlumturia e Tij Johan.

Fortlumturia e Tij Joan Pelushi, Kryepeshkopi i Tiranës, Durrësit dhe i gjithë Shqipërisë.

Në ceremoni morën pjesë:

1- Përfaqësues të lartë të shtetit shqiptar.

2- Përfaqësues të lartë të shtetit grek.

3- Delegacione nga 13 Kishat Ortodokse të botës.

4- Delegacion nga Vatikani, ku bënte pjesë kryepeshkopi Flavio Paçe (Pace).

Shteti shqiptar u përfaqësua nga:

1- Presidenti i Republikës së Shqipërisë Bajram Begaj.

2- Kryetarja e Kuvendit të Republikës së Shqipërisë Elisa Spiropali.

3- Zv/Kryeministrja Belinda Balluku.

4- Ministri për Europën dhe Punët e Jashtme, Igli Hasani.

5- Deputetë dhe ministra.

Palë politike me statusin e pjesëmarrësit ishte edhe z. Sali Berisha (deputet dhe kryetar i Partisë Demokratike të Shqipërisë).

Shteti grek u përfaqësua nga:

1- Ministri i Mbrojtjes i Greqisë, Nikos Dendias.

2- Ministrja e Arsimit, Sofia Zakharaqi (Zacharaki).

Presidenti i Republikës së Shqipërisë Bajram Begaj uroi Fortlumurinë e tij Joan për ngjitjen në fronin më të lartë të Kishës së Udhës së Drejtë të Mëvetësuar (Ortodokse Autoqefale) Shqiptare duke e quajtur këtë ditë si historike për Autoqefalinë e saj dhe për gjithë shoqërinë shqiptare.

“Vazhdoftë denjësisht udhën e Fan Nolit, Anastasit dhe gjithë paraardhësve të Tij! Përmbushtë me ndriçim, hir e urtësi misionin e Tij hyjnor si bari i grigjës së besimtarëve ortodoksë, në shërbim të njerëzve, jetës shpirtërore, lumturisë dhe harmonisë”, deklaroi kryetarja e Kuvendit të Republikës së Shqipërisë Elisa Spiropali.

Nga Kishat Orthodhokse morën pjesë Mitropolitët:

1- Emanuel i Kalqedonës dhe Serapioni i Paramithisë, Filiatëve dhe Gjiromerit (nga Patriarkana Ekumenike).

2- Serafimi i Zimbabvesë dhe Angolës (nga Patriarkana e Aleksandrisë).

3- Ignati Al-Houshi i Francës, Evropës Perëndimore dhe Jugore (nga Patriarkana e Antiokisë).

4- Nektari i Anfidonit (nga Patriarkana e Jerusalemit).

5- Nestori i Korsunit dhe Evropës Perëndimore (nga Patriarkana e Rusisë).

6- Theodhosi i Rashkës-Prizrenit dhe Arsenio i Nishit (nga Patriarkana e Serbisë).

7- Nifoni i Tërgovishtit (nga Patriarkana e Rumanisë).

8- Serafimi i Nevrokopit dhe Grigori i Vracës (nga Patriarkana e Bullgarisë).

9- Gerasimos Sarasenicze i Zugdidit dhe Çaisit (nga Patriarkana e Gjeorgjisë).

10- Peshkopi Kristofor i Karpasias (nga Kisha e Qipros).

11- Justini i Krenës së Re, Athanasi i Sisanit dhe Siatistës, Nektari i Korfuzit, Kaliniku i Kosturit (nga Kisha e Greqisë).

12- Peshkopi Pavllo (Tokajuk) (nga Kisha e Polonisë).

13- Kryepeshkopi Gjergji i Mihalovcës dhe Kosicës (nga Kisha e Çekisë dhe Sllovakisë).

14- Josifi i Tetovës dhe Gostivarit dhe Jakovi i Shtipit (nga Kisha e Maqedonisë së Veriut).

15- Nikodhimi i Bostonit (nga Kisha Orthodhokse e Amerikës - OCA).

16- Priftmurgu Irine i Patriarkanës së Jerusalemit.

17- Arqimandriti Irine përfaqësoi patriarkanën e Serbisë.

18- Arqimandriti Andrea përfaqësoi Patriarkanën e Moskës.

KUSH ËSHTË FORTLUMTURIA E TIJ KRYEPESHKOPI JOAN?

Ai është pagëzuar civilisht me emrin Fatmir Pelushi.

Ka lindur në Tiranë në vitin 1956.

Ai u pagëzua fshehurazi në vitin 1979, gjatë periudhës së persekutimeve, nga At Kozma Qirjo, i cili më vonë u bë Peshkopi i Apollonisë.

Ndoqi studimet në degën e Psikologjisë në Universitetin e Tiranës.

Ndoqi studimet në Fakultetin Teologjik të Kryqit të Shenjtë në Boston, ku u dallua për rezultatet e tij të shkëlqyera.

U dorëzua dhjak dhe prift në vitin 1994.

Në vitin 1998 u zgjodh Mitropolit i Korçës, detyrë kishtare të cilën e ushtroi për njëzet e shtatë vjet, duke zhvilluar një veprimtari të pasur baritore, shpirtërore dhe shoqërore.

Përfaqësoi Kishën Orthodhokse Autoqefale të Shqipërisë në shumë konferenca dhe bashkëbisedime ndërorthodhokse.

Ka shkruar e përkthyer botime teologjike në gjuhën shqipe.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit

Fortlumturia e Tij Joan Pelushi, Kryepeshkopi i Tiranës, Durrësit dhe i gjithë Shqipërisë.