UNICEF-i: NJË MILION FËMIJË NË HAITI JANË PA BUKË | 2.85 MILIONË VUAJNË NGA NIVELE TË LARTA TË PASIGURISË USHQIMORE.

Port-au-Prince, Haiti | “Më shumë se një milion fëmijë po përballen me nivele kritike të pasigurisë ushqimore në Haiti”, sipas vlerësimeve të UNICEF-it, i cili, e bëri të ditur këtë në një deklaratë zyrtare të enjten e Madhe.

Në përgjithësi, UNICEF vlerëson se 2.85 milionë fëmijë - ose një e katërta e të gjithë popullsisë së fëmijëve në Haiti - po përballen vazhdimisht me nivele të larta të pasigurisë ushqimore në të gjithë vendin, sipas përditësimit të fundit të Klasifikimit të Fazës së Sigurisë Ushqimore të Integruar (IPC) të botuar këtë javë.

“Ne jemi duke parë një skenar ku prindërit nuk mund të ofrojnë më kujdes dhe ushqim për fëmijët e tyre për shkak të dhunës së vazhdueshme, varfërisë ekstreme dhe një krize të vazhdueshme ekonomike”, tha znj. Geeta Narayan, përfaqësuesja e UNICEF-it në Haiti.

“Veprimet për shpëtimin e jetës, të tilla si ekzaminimi i fëmijëve në rrezik të kequshqyerjes dhe sigurimi i fëmijëve të kequshqyer të kenë akses në trajtimin terapeutik, nevojiten tani për të shpëtuar jetën e tyre”, shtoi ajo.

“Rritja e pasigurisë ushqimore është e ndërlikuar nga një emergjencë në rritje e shëndetit publik dhe kushte të ngjashme me urinë që prekin rreth 8400 njerëz.

Shërbimet shëndetësore në vend janë nën presion të madh, me më pak se 50% të objekteve shëndetësore në Port-au-Prince funksionale dhe dy të tretat e spitaleve të mëdha publike jashtë shërbimit.

Ndikimi tek fëmijët është i rëndë dhe megjithatë, edhe pse nevojat e tyre rriten, përgjigja kufizohet gjithnjë e më shumë nga boshllëqet e financimit.

Programi ushqimor i Veprimit Humanitar për Fëmijët i UNICEF-it përballet me një hendek të madh financimi prej 70% duke kufizuar aftësinë tonë për të arritur më të rrezikuarit”, thuhet në deklaratë, duke vënë në dukje se deri më tani (në vitin 2025), UNICEF-i dhe partnerët e tij kanë trajtuar më shumë se 4600 fëmijë me kequshqyerje të rëndë akute.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit