ZONJA DILEK IMAMOGLU: ASI NË MËNGË I UDHËHEQËSIT TË OPOZITËS TURKE TË BURGOSUR EKREM IMAMOGLU.

Stamboll, Turqi | Z. Ekrem Imamoglu, kryebashkiaku popullor i Stambollit dhe një kundërshtar kryesor politik i presidentit Rexhep Taip Erdogan (Recep Tayyip Erdogan), u arrestua dhe u burgos në mes të muajit mars me akuza penale për korrupsion, duke shkaktuar një shpërthim shoqëror në Turqi.

Që atëherë, mijëra njerëz në qytetin më të madh të vendit janë mbledhur çdo natë para bashkisë për të shprehur mbështetjen e tyre për z. Imamoglu.

Ata po demonstrojnë në sheshin Saratsane, duke kërkuar lirimin e z. Ekrem Imamoglu dhe janë varur nga fjalët e bashkëshortes së tij.

Sa herë që znj. Dilek Imamoglu del në skenë, turma shpërthen në duartrokitje entuziaste.

Në fjalimet e saj të zjarrta në demonstrata, ajo vë në shënjestër presidentin Erdogan.

“Ai do t'ju mundë, ju do të humbni. Padrejtësia e vuajtur nga Ekremi prek ndërgjegjen e të gjithëve”, tha ajo.

Për momentin, megjithatë, me gjithë mbështetjen e publikut për të, brenda dhe jashtë vendit, duket sikur është mundur përkohësisht.

Pozicioni i tij si kryebashkiak i Stambollit iu hoq dhe ai ndodhet në paraburgim.

Nesër, të premten (11.4.2025), ai do të dalë para gjykatës së Stambollit për një çështje që përfshin një kërcënim ndaj kryeprokurorit të Stambollit, Akin Gürlek.

Kjo do të jetë hera e parë që z. Imamoglu shfaqet në publik që nga arrestimi i tij muajin e kaluar në një çështje të veçantë, megjithëse është e paqartë nëse seanca do të jetë e hapur për publikun.

Z. Gyurlek, fillimisht si gjyqtar dhe më pas si prokuror, luajti një rol të rëndësishëm në proceset e mëdha që kishin të bënin me ndjekjet e personazheve të opozitës, ndërsa në të kaluarën ai kishte shërbyer si zëvendësministër i Drejtësisë.

Në aktakuzë thuhet se z. Imamoglu përdori gjuhë fyese ndaj tij dhe u përpoq ta frikësonte.

Seanca do të zhvillohet në sallën e gjyqit në burgun e Marmarasë - i njohur deri vonë si Burgu i Silivrit - ku po mbahet ish-kryebashkiaku.

Prokurorët kanë kërkuar një dënim me burg deri në shtatë vjet e katër muaj për z. Imamoglu, i cili, ka qenë i përfshirë në gjyqe që përfshijnë korrupsion, parregullsi dhe fyerje.

Në këtë klimë dhe ndërsa laku shtrëngohet rreth z. Imamoglu, shumë këmbëngulin se bashkëshortja e tij, e cila, vlerësohet shumë në qarqet politike, mund të marrë frenat e opozitës turke.

Kush është znj.  Dilek Imamoglu?

Znj. Dilek Imamoglu ka lindur më 18 nëntor 1974 në Trabzon. Ka studiuar në Universitetin e Stambollit në Departamentin e Turizmit.

Pas përfundimit të studimeve universitare, ajo mori titullin master në administratën publike. Ajo u martua me karizmatikun Ekrem Imamoglu në vitin 1995 në moshën 21-vjeçare dhe pati tre fëmijë me të.

Pasioni i tyre për politikën formëson jetën e tyre familjare edhe sot e kësaj dite.

“Znj. Dilek është shtylla kurrizore e shtëpisë sonë - kishte thënë bashkëshorti i saj në një intervistë të mëparshme për Cumhuriyet TV - Ajo nuk është vetëm gruaja ime, por edhe mbështetja ime më e madhe”.

Ajo është e përfshirë në të drejtat e grave dhe luftën kundër diskriminimit kundër pakicave, bën punë vullnetare dhe shkëlqen në akademi.

Në tezën e saj të magjistraturës, të shkruar gjatë studimeve në Fakultetin e Shkencave Politike dhe Administratës Publike në Universitetin Kadir Has në Stamboll, ajo shqyrtoi fenomenin e “Tavanit prej xhami”, pengesën psikologjike, sociale ose organizative, që pengon individët e aftë dhe ambiciozë, veçanërisht gratë dhe anëtarët e grupeve minoritare, të ngrihen në pozitat më të larta të pushtetit.

Ajo hetoi barrierat e padukshme që i pengojnë gratë dhe pakicat të hyjnë në poste drejtuese.

Që kur bashkëshorti i saj fitoi zgjedhjet vendore në Stamboll në vitin 2019, znj. Dilek İmamoğlu ka punuar gjithashtu për të rritur ndërgjegjësimin për të drejtat e personave me aftësi të kufizuara.

Për shembull, ai kaloi një ditë duke kaluar nëpër Stamboll në një karrocë për të nxjerrë në pah luftën e përditshme me të cilën përballen ata që i përdorin ato në qytet.

Ajo duhet të kandidojë kundër presidentit Erdogan.

Veçanërisht gratë dhe të rinjtë e kanë interpretuar praninë e saj në skenën politike si një simbol të guximit dhe qëndrueshmërisë demokratike.

Shumë gra që e mbështesin madje janë të bindura se ajo mund të ndërtojë mbi trashëgiminë politike të burrit të saj.

“Ajo duhet të jetë kandidate kundër Erdoganit”, komentojnë anëtarët e turmës që e kanë dëgjuar së fundmi në sheshin në Saraçane, përballë ndërtesës së Bashkisë Metropolitane të Stambollit.

“Ajo është shumë e fortë. Ne jemi gjithmonë pranë saj. Si ajo dhe Ekrem Imamoglu”, tha një tjetër protestues.

Zgjedhjet e ardhshme parlamentare dhe presidenciale nuk priten deri në vitin 2028.

Por ka arsye të mira që si qeveria ashtu edhe opozita të kërkojnë zgjedhje të parakohshme.

Nëse data e votimit zhvendoset, presidenti Erdogan mund të kandidojë sërish.

Nëse zgjedhjet mbahen në vitin 2028, atëherë sipas kushtetutës turke kjo nuk do të ishte e mundur.

Ky rregull mund të rrëzohej vetëm me një amendament kushtetues, i cili, do të kërkonte një shumicë prej dy të tretash në parlamentin turk.

Në dritën e krizës aktuale, Partia Popullore Republikane (CHP) e opozitës do të përfitonte gjithashtu nga avancimi i zgjedhjeve.

Shpallja e një kandidati të ri do të rriste presionin ndaj presidentit Erdogan.

Vetë znj. Dilek Imamoglu nxiton të shohë të shoqin jashtë burgut dhe dëshiron të përfaqësojë Turqinë moderne.

Ajo i ka lyer flokët bionde, ka një tatuazh në krah, nuk mban shami dhe shpesh shprehet përmes rrjeteve sociale.

Popullariteti i saj shtohet nga fakti se ajo jo vetëm që mbështet të shoqin, por trajton edhe çështje sociale.

Siç tha një grua nga turma e protestuesve së fundmi për entin mediatik gjerman “DW” qëndrimi i palëkundur i znj. Dilek Imamoglu për arrestimin e bashkëshortit të saj është një model për të gjitha gratë dhe një frymëzim për rezistencë.

“Kjo tregon se sa e palëkundur është ajo kundër tiranisë”, tha ajo.

Para se z. Imamoglu të arrestohej, të gjithë po diskutonin tashmë kandidatët e mundshëm alternativë presidenciale.

Nëse ka një diskutim serioz për një kandidat alternativ të CHP-së, ajo duhet të jetë znj. Dilek Imamoglu.

Thirrja e saj për demokraci në gazetën britanike Ekonomisti (The Economist).

Në fund të muajit mars, znj. Dilek Imamoglu shkroi një artikull në gazetën The Economist, duke përshkruar sesi arrestimi i bashkëshortit të saj e ktheu një kryetar bashkie në lëvizje.

Kur ai u arrestua në orët e para të 19 marsit, miliona njerëz në të gjithë Turqinë u ndjenë tamam si unë: jo vetëm trishtim, por një ndjenjë e fortë padrejtësie dhe zemërimi në rritje.

Nën qeverinë aktuale, e cila, ka zgjatur më shumë se dy dekada, shumë turq janë detyruar të përballen me këto ndjenja ndërsa vendi i tyre zhytet më thellë në autoritarizëm.

“E kisha ndjerë prej ditësh se diçka po vinte. Ekremi, njeriu që rrëmbeu Stambollin nga duart e Partisë për Drejtësi dhe Zhvillim (AKP) e presidentit Rexhep Tajip Erdogan në zgjedhjet vendore në muajin mars të vitit 2019, dhe që e ka mundur atë dy herë që atëherë, është përballur prej kohësh me një përpjekje të pandërprerë për ta larguar atë nga jeta publike. Por në muajt e fundit sulmet janë bërë më të egra”, tha ajo.

“Si bashkëshorte dhe partnerja e tij në luftën për drejtësi, unë kam qëndruar fort në krah të Ekremit në çdo fushatë shpifjeje, çdo rast të sajuar dhe çdo tentativë brutale për vrasjen e personazheve.

Arrestimi i tij erdhi disa ditë para se të zgjidhej si kandidati kryesor i opozitës, Partisë Popullore Republikane (CHP) për zgjedhjet e ardhshme presidenciale.

Tani, Ekremi, kryebashkiaku i Stambollit, dhe ekipi i tij, që sfiduan një sistem të padrejtë, të pabarabartë dhe të paligjshëm, po përballen me akuza të pabaza.

Akuzat ndaj tij do të ishin qesharake nëse qëllimi i tyre nuk do të ishte aq serioz.

Një diplomë universitare që mori 31 vjet më parë u shpall papritur e pavlefshme, me qëllim skualifikimin e tij nga posti i presidentit.

Arrestimi dhe largimi i tij nga detyra kishin për qëllim frikësimin e tij dhe të publikut.

Përkundrazi, ata kanë mobilizuar njerëz në të gjithë Turqinë. Në të gjithë krahinat dhe klasat, pavarësisht moshës, origjinës apo gjinisë, miliona njerëz e shohin këtë moment si një pikë kthese për demokracinë e vendit.

(...) Ekrem është bërë simbol i ndryshimit për të cilin Turqia ka shumë nevojë. Qoftë pas një tavoline apo pas hekurave, ai nuk është vetëm.

Në zgjedhjet e hapura paraprake të CHP-së, më shumë se 15 milionë njerëz e mbështetën atë si kandidat presidencial të partisë.

Ai përfaqëson miliona që duan të qeverisen në mënyrë të drejtë dhe që ende besojnë në parimin themelor të demokracisë sonë: se sovraniteti i takon pa kushte popullit.

Ky vullnet nuk është thyer, pavarësisht ndalimeve, arrestimeve dhe kërcënimeve.

Unë si bashkëshortja e tij dhe si qytetare nuk do të dorëzohem.

Marr forcë dhe kurajo nga gratë në të gjithë Turqinë - nënat, profesionistët, studentet, të rejat, punëtorët që po qëndrojnë. Unë besoj në vendin që ne mund ta rindërtojmë, bazuar jo në frikë, por në demokraci, shtet ligjor, barazi, përfshirje dhe bashkëjetesë.

Rruga përpara është e vështirë, si për vendin tim, ashtu edhe për familjen time.

Megjithatë, ata që besojnë se burgosja e njerëzve do t'i mbyllë në heshtje idetë e tyre gabohen.

Drejtësia nuk mund të dalë jashtë ligjit. Vetëdija nuk mund të ndryshohet.

Ky vend ka kaluar kohë të errëta dhe do të dalë nga periudha e re e errët, me vullnetin e tij demokratik të paprekur.

Ne i detyrohemi jo vetëm themeluesve të demokracisë, por edhe njerëzve të të gjitha moshave dhe klasave shoqërore që kanë dalë në rrugë për të treguar dëshirën e tyre për një të ardhme më të mirë”, tha ajo.

Nga z. Erton Duka.

© Copyright | Agjencia Telegrafike Vox

Ne të njohim me botën | www.007vox.com | Burimi yt i informacionit